تاج الأحلام

وحشتونى وحشتونى وحشتونى
الحمد لله خلصت العام الدراسى خلصت وخلصت
أدعولى بقى ربنا يستر فى النتيجة
أولا أحب أهنىء كل المدونين المشاركين فى كتاب مدونات مصرية للجيب بجد كتاب سمعت عنه إنه رائع ومشتاق لقرايته
ثانيا باركولى وهنونى فقد جائنى ولأول مرة تاج... التاج المسمى بتاج الأحلام والذى جائنى من حيث لا أتوقع من أختى الغالية دائما سالى بنت مصر وبنت دمياط والذى بفضله على رأيها تم تدشينى رسميا بوسام البلوجرية
لأكون مدون ميه فى الميه
والتاج هيبقى صعب الأجابة عليه أوى لإن واضح من أسمه إنه تاج الأحلام وانا مبعرفش أحلم خااااااااالص
فربنا يستر
ثالثا أحب أوجه إعتذر رسمى لكل المدونين إللى قرأو البوست الماضى وأعلنوا عن غضبهم إتجاه هذا البوست وعلى رأسهم المدون أحمد الصباغ بجد بعتذرلهم جميعا
مع الإحتفاظ بحقى فى رأيى الذى أرى و يرى الكثيرين أنى لم أخطىء فيه
وأرحب بمناقشتهم جميعا مصرا على أن الحوار هو الطريقة الوحيدة لفهم وجهة نظر الأخر وإزالة أى من كان عالقا من سوء تفاهم أو غيره
والله الموفق
نبدأ بقى نجاوب على التاج..........
بسم الله الحمن الرحيم
أذكر خمس أحلام على الأقل تخص ماضيك وتحلم فيها بتغيير أشياء ماذا ستعدل وماذا ستترك
فى الماضى يعنى زمااااااان وانا صغير كانت أحلامى تشبه احلام أى حد فى سنى كنت عايز أطلع ظابط أو مهندس او دكتور ولما كبرت شوية وانا فى ثانوى كان نفسى أطلع مهندس وبس والحمد لله أدعولى ربنا يوفقنى فى ده مهندس أبنى
أبنى بلدى ودينى ووطنى وأبنى كل حاجة تفيد الناس
ومن ضمن أحلامى القديمة أشوف إخواتى كلهم بالمناسبة أنا ليا أربع إخوات بنات نفسى أشوفهم زى أى أب نفسه يشوف بناته متجوزين ومستورين ومتعلمين والحاجات دى يعنى وده بيتحقق شوية شوية مع مرور الزمن فواحدة إتجوزت والتانية مخطوبة وطبعا الظروف صعبة زى منتوا عارفين اليومين دول فربنا يستر
والإتنين التانيين فى مراحل التعليم المختلفة أدعولى وأدعولهم.......
واهم أحلامى طول عمرى كان نفسى أقابل صديق أو أخ بمعنى الكلمة وده لسة بدور عليه ومش عارف ألاقيه
وأهم أحلامى القديمة إللى ماإتحققتش بسبب حاجات كتير بعضها معروف كان نفسى من زمان أحب
الحب.....متهيألى لسة موجود مش كده
أذكر خمس أحلام على الأقل تخص مستقبلك
المستقبل الجميل بقى

المستقبل عندى غير الماضى خاااااااااااااااااااالص
أولا نفسى أكون معمارى كبير أكبر معمارى فى مصر وفى العالم وأرفع إسم مصر فوق أى إسم
ثانيا نفسى مصر تطالب بحقوقها فى الملكية الفكرية للأقصر لاس فيجاس و يتم تنفيذ مشروع ممر التنمية والتعمير ( هنتكلم عليهم بشكل موسع البوستات القادمة )
بعد كونى معمارى كبير معرفش إزاى فى نفس ذات الموقف وفى نفس ذات اللحظة عايز أبقى سياسى ناجح وأقف فى وش الظلم والفسادوالمحسوبية والرشوة وعندى فكرة تأسيس حزب بل ووضعت أهدافه كمان حاسس إن مش دى مصر عايز أصلح حاجات كتير كتير جدا كل حاجة وأى حاجة مش شايف حاجة بتحصل كويسة من تعليم وتعلم وصناعة تجارة وحتى سياسة
ومن مبدأ العمارة أم الفنون أستوحيت مبدأ أخر وهو السياسة أم الفنون وليست العمارة
فأنا أرى السياسة بحر واسع يغرق فيه الكثيرين وهى فن أيضا لايجيده الكثيرين فى مصرنا الأن وسأشرح فيما بعد من أين جائنى هذا الإيحاء
ومن احلا م المستقبل أيضا أطلع أمى حبيبة قلبى ست الكل بجد رحلة الحج إللى نفسها فيها وبكده يبقو الخمس أحلام خلصوا والحمد لله
ولكنى لا أسميها أحلام ولكن هى أهداف وأعمل جاهدا على تحقيقها فالفرق شاسع بين الحلم والهدف
أذكر شخصين على الأقل متواجدين فى حياتك حالياكنت تود وجودهم قبل الآن بزمن
كل أصدقائى المدونين والتدوين عامة كنت أود أعرفه وأعرفهم من زمان وكانوا سيغيرون كثيرا فى حياتى وإهتماماتى
لا اعتقد أنه يوجد شخصا أخر عرفته وتمنيت أن أعرفه قبل الآن
أذكر شخصين على الأقل غير متواجدين فى حياتك حاليا كنت تود وجودهم الأن أو فى حياة أولادك مستقبلا
أولهما أبى ....أبويا يعنى.. كان نفسى يبقى معايا دلوقتى وأفرحه أبى الذى رحل عنا فى السادس والعشرين من هذا الشهر ولكن فى سنة 97 أى انه فى 26 من الشهر الجارى تكون ذكراه الحادية عشر
ونفسى يبقى فى فى حياتى الفترة القادمة أو مستقبلا الحب الذى كثيرا ما إنتظرته وتمنيته فى زمن يصعب فيه الحصول على ما يسمى بالحب
وأخيرا وليس أخرا أدعوا الله إلى مرسلة هذا التاج سالى بنت دمياط أن يوفقها الله ويوفق شعبها شعب دمياط ويثبت أقدامهم فى الوقوف فى وجه الظلم وأقول لها ولهم شعب مصر كله معكم ويرفض المصنع كما ترفضون ويرفض الحكومة العميلة هذه كما ترفضون
وبكده أكون حاولت جاهدا أنا أجاوب على
تاج الأحلااااااااااام
ناقص بقى مرحلة التمرير
أمرر التاج لمين
لكل المدونين الزعلانين الغاضبنين من البوست إياه وبدعوهم وبقولهم فى تاج الأحلام
تعالوا نحلم
أحمد الصباغ
آبى
هيثم الدهشان