Monday, August 11, 2008

رسالة شكر إلى محافظ القاهرة


بجد أنا مش مصدق إنى بركة وسرى باتع وصيتى واصل أوى كده من أول رسالة كده علطول ده على كده هبعت رسالة لجورج بوش يسيب العراق ويمشى أحسن له
ملحوظة إللى مش هيفهم حاجة يقرا البوست اللى فات
بقى ياسيدى صيحت من النوم الصبح ولبست ورايح الموقع كما جرت العادة وبوهم نفسى إنى خلاص بقيت مهندس
أوم إيه
عقبال ما وصلت على الطريق العمومى بتاع منتقتنا إللى بمشى فيه حوالى خمس دقايق وأوصل للمترو والاقى كام عربية من النص نقل بتاع الحكومة وعمالين يكسروافى الأكشاك بتاعة أكسسوار الموبيلات والعطور والشوز وكل حاجة موجود على الطريق ووراهم كام عربية من بتوع المرور إللى هما بيكلبشوا العربيات إللى راكنة فى الممنوع وبما إن العربيات فى دار السلام كلها راكنة فى الممنوع فكانو بيكلبشوا كل العربيات بس كده
لأ وكمان إيه عمال النظافة الله يكرمهم إللى لما حد يعدى عليهم يديهم شنطة زبالة وميدهمش فلوس ويقول لحد منهم نهارك أبيض يرد عليه يقولوا نهارك أسود ودى حصلت قدامى المهم لقيتهم شغالين ماشاء الله أنا قلت فى الأول تلاقى حد مهم معدى ولا حاجة مع أن ده محصلش فى دار السلام قبل كده
قوم إيه
وصلت لغاية كوبرى دار السلام عشان الاقى لجنة فيها مزيج من الرتب المختلفة وشوية عساكر مبيوقفيوش ولا ميكروباص فى الممنوع وعمالين نازلين مخالفات على صباحية ربنا بينى وبينكم السواقين كانو صعبانين عليا بس بينى وبينكم برضوا يستاهلوا إنه لا يصح إلا الصحيح وهما دول السواقين إللى بينشفوا ريق الناس عشان الأجرة وقلة الأدب إللى بيعملوها أهو جالهم إللى يربيهم كل ده عادى كنت ساعات بشوفه كل سنة مرة كده قبل العيد أو قبل السنة الدراسية الجديدة
ولكن الغريب بقى أنى وانا راجع أخر النهار لقيت نفس الموضوع
طريق مفتوح
عربيات لأول مرة بتجرى براحته
حتى كان فى واحد هيخبطنى لأنى بعدى الطريق براحتى معتمد على إنى وانا بتمشى أسرع من عربيات دار السلام
لأ وإيه
شالو كل بتوع العيش والمحمول والفاكهة وبتوع الليف والخضار والكريمات الضاربة كل دول معرفش ودوهم فين والطريق بدل ما كان بيمشى فى عربية واحدة بقى تلاتة واربة بالعرض يعنى
وكمان علاوة على كده كله
بقى فى أقل من ربع العربيات الموجودة على الطريق لأن عربيات دار السلام كلها من غير ورق وبالتالى كلها أختفت النهاردة والحمد لله
والكوبرى لأول مرة الأقيه مش واقف عليه ولا عريبة وسالك والحمد لله
والجديد بقى ركن العربيات صف واحد وعربية بتاعة كلبشات ركنة جانب السنترال مستنية إللى ماما تدعى عليه
وياسلام على دار السلام لما تتمدن
حطوا قدام كل بيت أو محل شجرة
هى أه شجرة صغيرة
بس مسيرها تكبر وعلى فكرة إجبااااااااارى
وظباط من كل نوع موجودين فى الشارع وقدام الكوبرى
وواحد صاحبى قالى إنهم رفعوا الزبالة إللى قدام المجمع إللى فى الشارع الرئيسى زى ما قلتلكوا
بس الزبالة جوه زى ماهى وعند العجمى الطريق مقفول خالص من الزبالة
بس واحدة واحدة
مش كله مرة واحدة
وانا مكنتش لسة عملت أى حاجة من مقترحات آبى ولا كريم ومكنتش هعمل منها إلى بسيط وقلت عليه فى التعليقات إللى فى أيدى يعنى
لكن حاجة مكنتش متوقعة خاااااااالص
منطقة الملاءة النهاردة
نيولوك
والشارع تزين بأكتر من مائة شجرة ده غير التواجد الأمنى ومفيش زحمة ولا قلة أدب ولا شجار بجد مكنتش مصدق
تفتكروا ده من أيــــــــــــــــــه
البوست بتاعى ههههههه
أشك
لأن أنا دايما منسى
هههههههههههههههه
طب ممكن يكون دعاء المدونين
ولا ده قانو المرور الجديد
كل شىء جائز
بس سيبكم أنتو
دار السلام من بره
هه من بره بس
بقت تحفة
وممكن أستضفكم فيها قريب
ده لو فضلت على كده
ملحوظة
المدونين إللى سألونى على أخبار ممر التنمية والتعمير هنزل الجديد فى البوست القادم إن شاء الله إللى أنا مش شايف إنه جديد أصلا
ملحوظة كمان من هنا وبأسم كل اهالى دار السلام ببعت رسالة شكر الى محافظ القاهرة
مش مهم علموا ده من إيه
المهم أنه تم واتعمل
المنســــــــــــــــــــــــــــــــــى

20 comments:

Diyaa' said...

حد طيب وجميل زيك كده أكيد ربنا مش هينساه وهيحققله أي حلم بسيط من أحلامه ويا رب منطقتك تبقي جميلة علي طول يا منسي يا خويا
تعرف إنه أكيد المحافظ مش قرا الكلام ده بس أكيد ومؤكد يعني إن ربك راضي عنك وخلي الأهتمام بمنطقتك يتأخر لحد ما تدوينتك نزلت ويا رب علي طول تبقي دار سلام مش دار تلوث ولا موت

وتلقائيتك دي هتخليني أوصيك علي أكتوبر وأي منطقة مش مهتمين بيها يمكن ربنا يسمع منك وتبقي كل مناطقنا جميلة وحلوة زيك كده

وعايزين نشوفك في أي مكان وأي منطقة ومش تمشي متأخر تاني يا منسي بيه :))

والسلام ختام
أخوك ضياء

بث تجريبي said...

السلام عليكم
اولا فرحانة لكل اللى حصل واللى مستغرباه بجد
وشيطانى بيوزنى وبيقولى دا مش هيفضل كتير
اكيد فى حاجه هتحصل عندكم
موكب مثلا او ممكن حرم الريس زهقت من القصر الجمهورى وعاوزة تصيف مثلا او تنزل تتمشى شوية فى دار السلام.

يارب دا يفضل على طول
بس انا عاوزة اعرف ايه اللى حصل بالظبط عشان دا كله يحصل؟؟


شوف يا شيخ قلب المواطن المصرى لما حاجه كويسة تحصل قلبه ينقبض
ربنا يستر على دار السلام

وتانى حاجة لفتت انتباهى فى كلامك
انهم مش اخدوا وقت يعنى الموضوع سهل اهو
امال سايبين البلد كدا ليه؟؟

اخر طلب
بالله عليك يا شيخ اخطف رجلك وبص على فايدة وطمنى عليها
اصلى قلقانة عليها .

سلاموز.

حاجات جوايا said...

بسم الله ما شاء الله
كل حد حصل من البوست اللى فات للبوست ده
طب وحياتك عايزين كام بوست كدا دولى ومحلى وعالمى يمكن ربنا يكرم بلدنا والبلاد المجاورة وغير المجاورة

يارب فعلا كل حاجة تتصلح فى البلد دى اللى تعبت اووووووووى من كتر الاهمال

بضم صوتى لصوتك وبشكر محافظ القاهرة " كان محافظنا برضه من كام سنة " ربنا يكرمه ويوفقه ويوفقكوا ويوفق مصر واولادها

------------
انا آسفه جدااااااا انى اتأخرت عليك فى الزيارة مع انى بدخل عندك دايما بس كل مرة أقوم من غير ما الحق اقرا حاجة

كامل ودى وعظيم احترامى

سالى

صباح الصباح said...

يابنى عشان انتا نيتك حلوة بس
مبروك يا معلم ويارب دايما كدة

Zanooba (Zeinab sab9n) said...

عزيزي المنسي ...
أنا مبسوطة أوي بجد إني لاقيت مدونتك ..و وعد إنها مش هتكون الزيارة الأخيرة ...و أنا أشكر معاك محافظ القاهرة بس يا رب بس تفضل الشوارع حلوة كده دايماً..و أقولك إيه الحال من بعضه يعني أنا من حلوان سيتي و حلوان سيتي قريبة من المعصرة و كوزيكا...يعني منطقتين عاوزين يعيدوا بنائهم ..و تقبل مروري
حياك الله

Asmaa Rabie said...

مبرووووووووووووووووك
علشان تعزمني عندك بقى
على الغدا او العشا
سمعت قصدي شفت غدا و عشا
وماتنساش تفردلي الارض ورد
ماشي؟؟؟

nigro said...

لأن فكرة نظرية المؤامرة غالبة على عقلية الشعب المصري اللي أنا واحد منه
و لأن سوء الظن من حسن الفطن
فأنا اشك إن اللي حصل ده كده من الباب للطاق او شفقن بحي دار السلام
أكيد فيه إنَّ
بس تبعاً لمبدأ طنش .. تعش .. تنتعش
و اللي ييجي من الحكومة أحسن من عنيها
يبقى
مبرووووك يا أبو الرشد على النضافة الظاهرية اللي حلت على شوارع دار السلام
و استمتعوا بيها شويتين كده
لأن طبقاً للنظريتين الأولانيين دول الوضع هيرجع قريباً لما هو عليه
و هذا مالا أرجوه
-------------------------
معلش يا أبو حميد ماعرفتش اتكلم معاك امبارح
الكيبورد كانت بايظة و الله
فرصة تانية إن شاء الله
و الجايات -إن شاء الله- أكتر من الرايحات



يلا سلام

حاجات جوايا said...

أخى الفاضل

ادعوك لزيارة مدونتى " واحة الفكر والقلم " والمشاركة بحملة مساعدة أطفال الشوارع على هذا الرابط المباشر

http://wa7et-elfkr.blogspot.com/2008/08/blog-post.html


خالص احترامى

سالى

المنسى said...

قبل ما أرد على التعليقات هو فى حاجة بس عايز أقولها على السريع
إن ظنون حضارتكم جاية فى محلها
وإن التغير والنظافة دى بتبقى صباحا بس
وبعد الظهر على الساعة 4 كده
برتجع ريمة لعادتها القدية
ده بعد من الحكومة بتروح يعنى
يعنى شعان نبقة نظاف كمان لمجرد النظافة
لازم يكون بالعافية وإجبارى برضو
يظهر فعلا إننا
شعب يخاف ميختشيش
نبدأ نرد بقى

--------------
ضياء
ربنا يكرمك يارب ياضياء على مساندتك وكلامك الجميل ده
بجد أنا سعيد لمعرفتك
واهو زى منت شايف الحلم مش أتحقق أوى بس الحمد لله
كده فى أمل
وأكيد بكرة أحسن بينا
إن شاء الله


------------------------
Do not Press F1
بصراحة أنا مستغرب الإسم قوى
روحت مدونتك وجميلة فعلا وياريت متبقاش مجرد بث تجريبى
فعلا شيطانك طلع عنه حق
بس مش أوى يعنى
لإنهم موجودين كل يوم
بقالهم 4 أيام كده
بس الصبح بس
الصبح بتاهم وبليل بتاعنا احنا بقى

أهو انا إللى مجننى بقى أن الموضوع سهل
أسهل من السهولة
يعنى لهو صعب ولا مستحيل
بس كل ما هنالك الناس تتعود عليه شوية
مش بعد سنين طويلة فى الزحمة والأهمال يغيروا ده بسهولة
بس فى الأخر من قبل الحكومة يعنى
سهل تنفيذه
إيه بقى إللى مخليهم ساكتين مش عارف

بالنوسبة لفايدة
تمام وبتسلم عليكى
بس دار السلام أحسن برضو
تخيلى بقت أروق
تخيلى
تخيلى
تخيلى
انا حاسس إنى بحلم
حتى ولو حلم نص يوم بس
مش مهم

المنسى said...

حاجات جويا
منورانى ياسالى
وياريت غيبتك ماتطولش تانى
أن شاء الله

انا برضو مكنتش أصدق أن سرىباتع كده
هههههههههه
تحياتى ليكى


-------------------
صبح الصباح
صبح الصباح
صبح الصباح
منور
أنا كنت بجرب الإسم بس
الله يبارك فيك
وربنا يسمع منك
ويديمها علينا نعمة


----------------------
Zanooba (Zeinab sab9n)
وحياك الله أنتى أيضا
أنا مبسوط أكتر بوجودك هنا
من حلون ده أحانا قرياب على كده
بس المعصرة أنا روحتها
جميلو والله
ومفتوحة
يارب فعلا متكونش الزيارة الأخيرة
نورتينى

المنسى said...

أعمليها إنتى بس ويبقى فطار وغدا وعشا عشان يبقى جيتى الصبح وشوفتى النظافة
ومشيتى بليل
وشوفتى الجانب الأخر من الشاطىء
المهم
متكنش غلطة زى ما قلتى
وتكون بجد الزيارة قريبة
وانا أفرشلك الأرض زى منتى عايزة

-----------------
نيجرو
حبيب قلبى
إزاى من الباب للطاق
يابنى دى بركتى بس
ليس إلا
ههههههههههه
مش بقولك
سرى باتع
هههههههههههه
بس سيبك إنتى
حلوة نظافة ظاهرية دى
ماش ياعم
بتغلط بس بالذوق
ههههههههه
هو فعلا زى ما ذكرت
مستمر نص يوم ههههههههه
أحسن من مفيش

أكيد الجايات أكتر
تحياتى ليك


--------------
حاجات جوايا
حصل
يافندم

شفـقــة و إحســــان said...

شكلك كده سرك باتع بجد طيب بقولك ايه ادعى لاختك شفقة واخوك احسان يبطلوا تسول ويشتغلوا شغلانة حلوة كده

دنـيـا محيراني(ايناس لطفي said...

اسفه لخروجي عن النص ولي راجعه ان شاء الله لتعليق علي موضوعك المهم
-------------------------
اصدقائي الاعزاء

يشرفني ان ادعوك للحضور حفل توقيع العدد الثاني من سلسله مدونات مصريه للجيب

وهو تحت اسم مصر في قطعة جاتوة

وسيقام يوم السبت الموافق 23-8 في ساقية الصاوي بقاعة بستان النيل من الساعه 7 الي 9

ويحتوي الكتاب علي مشاركتكم في حاله الحوار التي دارت حول التعليم بمدونه انا وصاحبي وسيتم نشر تعليقاتكم وارائكم في هذا الموضوع فيما كانت تحتوي علي افكار واراء جديره بالنشر مع اسم صاحبها
نتمني وجودكم في الحفل ونرجو الدعايه له من خلال مدوناتكم بنشر ميعاد ومكان حفل التوقيع
ليتم دعوه اكبر عدد من المدونين لكي نتشارك جميعا في الاحتفال بهذا الحلم الجميل
اتمني وجودكم معانا
وهذه ودعوه عامه لكل المدونين للمشاركه معانا في هذا الحفل الجميل
تحياتي

nigro said...

ابو الرشد
إزيك يا محمد .. أخبارك إيه
عاوزين نشوفك قريب كده إن شاء الله
انا سامع إن فيه يوم افطار جماعي
لو حصل
يبقى يا ريت اشوفك فيه

كل سنة و انت طيب يا محمد
بلّغكم الله و إياي فضائل الشهر الكريم و أعاننا على الصيام و القيام


يلا سلام

5ant05 said...

Nice To See Dar Es Salam Blurring
Ana Men El Sayeda Wel Hagat De Meta'ouden Aleha
Cheers
http://u-wave.blogspot.com/

ميرا ( وومن ) said...

يا فرحة ما تمت يادوب روحت الصبح ودار السلام نضيفة رجعت لقيتها زي ما هي

علي فكرة سواقين الميكروباس بعد النوع ده من الحملات بيرجعوا اشرس من الأول

خلي بالك بقي

nigro said...

محمد باشا
إزيك يا منسي و أخبارك إيه؟
يا رب تكون بخير

كل سنة و انت طيب و كل اللي بتحبهم طيبين
تقبل الله منا و منكم
عاوزين نشزفك قريب كده إن شاء الله
إن شاء الله


يلا سلام

طلبة جامعة المنوفية...... نقول said...

جزاكم الله خيرا على كلماتك ونسأل الله لكم مزيدا من التفوق

نتمنى زيارتناومساعدتنا فى نشر المدونة
طلاب جامعة المنوفية

kochia said...

ارجو انك تكون بكل خير
انت فين كل ده

ميرا ( وومن ) said...

منسي

انت نسيت المدونة ولا ايه
؟؟؟؟؟؟؟؟؟؟؟؟