وحشتونى

بعد غياب طويل وراحة من الكتابة والتدوين وإنفصال تام عن كل ما يشغل العقل والبال
ومرحلة من مراحل اليأس وتكبير الدماغ والتعب والكلل والملل
والإحساس بعدم القدرة على فعل أى شىء أو تغيير أى شىء
وحشتنى مدونتى جدا ووحشونى المدونين جدا جدا
برسل سلامى إلى كل المدونين بوجه عام وبقول لهم إن الحياة من غيرهم بجد ناقصها كتير
وبوجه خاص إلى المدونين إللى سألوا عليا وراسلونى فى غيابى
وبطمنهم وبقولهم الحمد لله أنا بخير بفضل دعواتهم
والمرحلة إللى فاتت كانت يأس تدوينى ليس إلا لكن الحمد لله كنت موفق فى مجالات أخرى
الحمد لله قضيت فترة الصيف بإستفادة بشكر ربنا عليها
والحمد لله دخل الملف بتاعى شهادتين جددوكالعادة بشرككم معايا فى فرحتى
شهادة التدريب الصيفى إللى بتعتبر شهادة خبرة ليا

وشهاد المستوى التانى من كورس الإنجليزى إللى والحمد لله قطعت فيه مرحلة كويسة جدا

والحمد لله الدراسة بدأت ومن ساعتها وإحنا ماشاء الله مطحونين لدرجة إنى مش عارف أشوف أمى ولكن الأمور بفضل ربنا ثم دعواتكم تمام والحمد لله
ممر التنمية والتعمير
الناس إللى كانت بتسأل عن ممر التنمية والتعمير بحب أطمنهم وقلهم ياجماعة مصر بخير والحمد لله الموضوع مفيهوش جديد كالعادة إلا أننا أعضاء جروب ممر التنمية والتعمير أو ده المفروض يعنى

قمنا بإرسال رسالة إلى صاحب المقترح
الدكتور فاروق الباز تنص على الآتى
السلام عليكم ورحمة الله وبركاته
أستاذنا العزيز وإبن مصر المعطاء
الدكتور فاروق الباز
نسأل الله جميعا أن تكون بخير داعين الله لك بدوام الصحة والإستقرار
نحن مجموعة من أبناءك وبناتك أبناء وبنات هذا البلد الذى دوما تفكر فى تقدمه وإرتقائه
لقد عرفنا بمقترحك الرائع ((ممر التنمية والتعمير ))
ونقوم الأن بنشره كبداية لأى مشروع عظيم مثل هذا المشروع بنشره وتعريف الناس به كما نصحت حضرتك لكى يكون هذا المشروع مشروعا قوميا ونقوم بذلك عن طريق المدونات المختلفة والفيس بوك وأى وسيلة أعلام متاحة
ونتمنى الإنضمام لحضرتك كى تمدنا بخبرة حضرتك فى خطواتنا القادمة وأن تكون معنا دائما موجها ومربيا وداعما ومحفزا إلى أن نحصل على ما تتمناه ونتمناه فى تنفيذ مقترحك الرائع كى نجنب مصر مستقبلا ليس بالأسود ولكن لا يليق بمكانتها بين الأمم
وإلى حضرتك روابط ما قمنا بعمله حتى الأن

http://www.facebook.com/group.php?gid=25883624458
رابط الجروب على الفيس بوك
http://elmancy2000.blogspot.com/2008/07/blog-post_15.html
رابط الموضوع على المدونة
http://www.facebook.com/group.php?gid=6625153727
جروب أخر خاص بالموضوع
http://www.facebook.com/group.php?gid=5185122683
جروب أخر خاص بالموضوع

وقمنا بإرسالها أيضا لكا أعضاء الجروب
وتفضل مشكورا دكتور فاروق الباز بالرد التالى
Dear Mohamed:
Many thanks for your thoughtful message and kind
remarks.
I had the opportunity to review your sites and I am
very pleased that you and your friends are getting
so involved.
My proposal was clearly for the benefit of your generation.
I am delighted that you are so concerned and discussing
all aspects of it with such concern.
Keep up the good work; may God bless you all.
Farouk El-Baz
وإللى ترجمتها بتنص على
عزيزى محمد
شكرا جزيلا لرسالتك المدروسة
وقد أتيحت ليا الفرصة لمراجعة موقعك وانا سعيد جدا انك وأصدقائك مهتمون بالمقترح وتعملون على تحقيقه
إقتراحة كان بشكل واضح لمنفعة جيلك
وسعيد جدا أنكم مهتمون به وتناقشونه بهذا الأهتمام
واصلوا العمل الجيد بارك الله فيكم
د: فاروق الباز
والحمد لله بعتنا الرسالة وردها على الجروب ولم يصلنا أى تعليق من أعضاءه مما أصابنى بالحاجات الكتير إللى قولتها فوق
دار السلام
أما بالنسبة لدار السلام والناس إللى كانت بتسأل التغيير ده تم ليه وهيدوم ولا لأ
فكل إللى اعرفه عن الموضوع إن دار السلام هتبقى مركز مستقل وليها قسم شرطة مستقل لإنها قبل كده كانت تابعة للبساتين والتغيرات إللى كانت بتحصل كانت للسبب ده هيدوم الكلام ده ولا لأ الله اعلم بس هى لغاية دلوقتى بخير والحمد لله حتى بعد ماهدوا أجزاء منها فى مدخل أسطبل عنتر على غرار حادث الدويقة ومعرفوش يسكنوا الناس إللى هجروهم فوقفوا الهدد وربنا يستر على إللى جاى كالعادة
مش هطول عليكم أكتر من كده أعذرونى لو مش هبقى موجود معاكم بشكل دائم الفترة القادمة أكيد هيبقى خارج إستطاعتى
وفقنا الله وأياكم إلى ما يحب ويرضى
ويبقى السلام هو مسك الختام
المنســــــــــــــــــــــــــــــــــــــــــــى

رسالة شكر إلى محافظ القاهرة

بجد أنا مش مصدق إنى بركة وسرى باتع وصيتى واصل أوى كده من أول رسالة كده علطول ده على كده هبعت رسالة لجورج بوش يسيب العراق ويمشى أحسن له
ملحوظة إللى مش هيفهم حاجة يقرا البوست اللى فات
بقى ياسيدى صيحت من النوم الصبح ولبست ورايح الموقع كما جرت العادة وبوهم نفسى إنى خلاص بقيت مهندس

أوم إيه
عقبال ما وصلت على الطريق العمومى بتاع منتقتنا إللى بمشى فيه حوالى خمس دقايق وأوصل للمترو والاقى كام عربية من النص نقل بتاع الحكومة وعمالين يكسروافى الأكشاك بتاعة أكسسوار الموبيلات والعطور والشوز وكل حاجة موجود على الطريق ووراهم كام عربية من بتوع المرور إللى هما بيكلبشوا العربيات إللى راكنة فى الممنوع وبما إن العربيات فى دار السلام كلها راكنة فى الممنوع فكانو بيكلبشوا كل العربيات بس كده

لأ وكمان إيه عمال النظافة الله يكرمهم إللى لما حد يعدى عليهم يديهم شنطة زبالة وميدهمش فلوس ويقول لحد منهم نهارك أبيض يرد عليه يقولوا نهارك أسود ودى حصلت قدامى المهم لقيتهم شغالين ماشاء الله أنا قلت فى الأول تلاقى حد مهم معدى ولا حاجة مع أن ده محصلش فى دار السلام قبل كده

قوم إيه
وصلت لغاية كوبرى دار السلام عشان الاقى لجنة فيها مزيج من الرتب المختلفة وشوية عساكر مبيوقفيوش ولا ميكروباص فى الممنوع وعمالين نازلين مخالفات على صباحية ربنا بينى وبينكم السواقين كانو صعبانين عليا بس بينى وبينكم برضوا يستاهلوا إنه لا يصح إلا الصحيح وهما دول السواقين إللى بينشفوا ريق الناس عشان الأجرة وقلة الأدب إللى بيعملوها أهو جالهم إللى يربيهم كل ده عادى كنت ساعات بشوفه كل سنة مرة كده قبل العيد أو قبل السنة الدراسية الجديدة
ولكن الغريب بقى أنى وانا راجع أخر النهار لقيت نفس الموضوع
طريق مفتوح
عربيات لأول مرة بتجرى براحته
حتى كان فى واحد هيخبطنى لأنى بعدى الطريق براحتى معتمد على إنى وانا بتمشى أسرع من عربيات دار السلام
لأ وإيه
شالو كل بتوع العيش والمحمول والفاكهة وبتوع الليف والخضار والكريمات الضاربة كل دول معرفش ودوهم فين والطريق بدل ما كان بيمشى فى عربية واحدة بقى تلاتة واربة بالعرض يعنى
وكمان علاوة على كده كله
بقى فى أقل من ربع العربيات الموجودة على الطريق لأن عربيات دار السلام كلها من غير ورق وبالتالى كلها أختفت النهاردة والحمد لله
والكوبرى لأول مرة الأقيه مش واقف عليه ولا عريبة وسالك والحمد لله
والجديد بقى ركن العربيات صف واحد وعربية بتاعة كلبشات ركنة جانب السنترال مستنية إللى ماما تدعى عليه
وياسلام على دار السلام لما تتمدن
حطوا قدام كل بيت أو محل شجرة
هى أه شجرة صغيرة
بس مسيرها تكبر وعلى فكرة إجبااااااااارى
وظباط من كل نوع موجودين فى الشارع وقدام الكوبرى
وواحد صاحبى قالى إنهم رفعوا الزبالة إللى قدام المجمع إللى فى الشارع الرئيسى زى ما قلتلكوا
بس الزبالة جوه زى ماهى وعند العجمى الطريق مقفول خالص من الزبالة
بس واحدة واحدة
مش كله مرة واحدة
وانا مكنتش لسة عملت أى حاجة من مقترحات آبى ولا كريم ومكنتش هعمل منها إلى بسيط وقلت عليه فى التعليقات إللى فى أيدى يعنى
لكن حاجة مكنتش متوقعة خاااااااالص
منطقة الملاءة النهاردة
نيولوك
والشارع تزين بأكتر من مائة شجرة ده غير التواجد الأمنى ومفيش زحمة ولا قلة أدب ولا شجار بجد مكنتش مصدق
تفتكروا ده من أيــــــــــــــــــه
البوست بتاعى ههههههه
أشك
لأن أنا دايما منسى
هههههههههههههههه
طب ممكن يكون دعاء المدونين
ولا ده قانو المرور الجديد
كل شىء جائز
بس سيبكم أنتو
دار السلام من بره
هه من بره بس
بقت تحفة
وممكن أستضفكم فيها قريب
ده لو فضلت على كده
ملحوظة
المدونين إللى سألونى على أخبار ممر التنمية والتعمير هنزل الجديد فى البوست القادم إن شاء الله إللى أنا مش شايف إنه جديد أصلا
ملحوظة كمان من هنا وبأسم كل اهالى دار السلام ببعت رسالة شكر الى محافظ القاهرة

مش مهم علموا ده من إيه

المهم أنه تم واتعمل

المنســــــــــــــــــــــــــــــــــى

رسالة إلى محافظ القاهرة

ياسيادة محافظ القاهرة يامحافظ بيه يامحافظة يانواب مجلس الشعب ياكل من هو قائم على العمل بأحياء القاهرة المختلفة بوجه عام وحى دار السلام الغنى عن التعريف للكثيرين بوجه خاص
أوجه لكم جميعا بإسم أهالى دار السلام
دار السلام التى تقل حواى 2 مليون مواطن فيما أكثر من الحوالى 9 مليون التى تقلهم محافظة القاهرة يعنى حوالى ربع سكان القاهرة أو يقل بقليل
دار السلام التى تشتهر بإسم الصين الشعبية ويعرف هذا كل من يستقل مترو الأنفاق فهى المحطة تكاد تكون الوحيدة التى ما أن يعبره المترو إلا وقد يكون قد خلى تماما وأمتلىء تماما بدون مبالغة
دار السلام التى يوجد بها كم شباب وطاقة بشرية غير عادية وانا واحد منهم طبعا
دار السلام إللى بمجرد أى أمين شرطة معفن يعرف أو يشك أو يشوف فى بطاقتك أو يشم بس ريحة إنك من دار السلام وراكب طيارة حتى لازم ينزلك ويفتشك تفتيش ذاتى كامل وكأنك قلتله من تل أبيب
دار السلام التى يحدها من النواحى الأربعة المعادى والمطبعة ونهر النيل والملك الصالح أو منيل الروضة
دار السلام التى تباع بها كل أنواع الصنف إللى هو المخدرات يعنى على مرأى ومسمع من أجهزة الأمن التى تكاد تكون منعدمة
دار السلام تحتضر ياسادة
دار السلام وتحديدا فى منطقة عزبة خير الله إللى هى منتقتى يعنى حصل فيها الأسبوع إللى فات إنفجار فى كل كابلات المنطقة تقريبا كادت أن تودى بحياة الكثيرين(((( ده طبعا ناتج عن الضغط وشدة حرارة الجو والضغط ناتج عن كثرة الأستهلاك لإن فى منتقتنا كل أسرة بتعيش فة أوضى وكل أوضة فيها عدادا وكل بيت فيه أوض كتيييييييييييييييير ومش سايبين الشقة كلها وقاعدين فى أوضى لاااااااااهو مفيش غير أوضة واحدة بس زى برعى بتاع شاهد مشفش حاجة ههههههههه))))
بعد أن كادت تودى بحياة الكثيرين لولا أنا عم زغلول وبعض من كهربائية المنطة بقيادة زعيم المنطقة عم زغلول بشكاير البودرة دخل على الكابل وهو بيفرقع زى الأسد وطفى النار إللى طالعة منه وكانو الكهربائيين فصلو التيار العمومى من الكابينة الأم
الحمد لله نمنا فى سلام من غير مراوح فى اليوم ده ومش هقولكوا بقى على إزاى الليلة دى عدت إلى أنا جائنا المدد فى نهاية اليوم التالىبتصليح الكهرباء
ملحوظة فى نفس اليوم كانت بعتت مباحث الكهراء لينا ناس متخصصة وعربيات مطافى بس كان بليل بعد ما كل حاجة خلص
كالعادة
دار السلام أيضا تغرق فى الزبالة وخصوصا فى الشارع الرئيسى الوحيد الموجود بها والموصل إلى المعادى وفايدة كامل من ناحية وإلى المطبعة ومنيل الروضة من الناحية الأخرى تصل فيه إرتفاعات الزبالة حوالى 3 متر بدون مبالغة
والمنطقة الثاية كمأوى لزبالة منطقة العجمى التى يوجد بها مقام سيدى العجمى وعلى جانبيها شركة النصر للتلفزيون ولاجانب الأخر مدرسة القاهرة الفنية المعمارية مدرستى سابقا وهى أكبر مدرسة على مستوى الجمهورية من حيث المساحة
والمكان الثالث أى مكان فاضى فى دار السلام إللى مفيهاش أماكن فاضية أصلا
تحت الكبارى أو الكوبرى يعنى الوحيد إللى فيها وجنب الأسواق وعلى نواصى الشوراع وجنب مجمع المدارس مشاء الله الزبالة بتنتشر بشكل مرروع لدرجة إنها وصلت للمخرج الوحيد المؤدى إلى الجيزة والسيدةوبيأخد عربيتين فى عرض الطريق
العربية الواحدة بقت بتعدى بالعافية
والله إرتفاع الزبالة وصل ل3 متر بدون مبالغة وركزو فى بدون مبالغة دى
دار السلام إللى كانت بتتوصف دى إللى هى منتقتى يعنى لا تحتوى على مداخل سوى مدخلين عرض كل واحد لا يتجاوز ال8 أمتار يستخدمهم كل سكانها تقريبا
أولهم مدخل شارع الجسر البرانى وده لدخول السيارات القادمة من الجيزة والسيدة زينب ولك أن تتخيل أن عرض الشارع ده فى أماكن منه لا يتجاوز ال4 متر وبيوسع ويضيق على حسب المحلات والورش وانت وحظك
والمدخل التانى ده للعربيات القدمة من السيدة عائشة يعنى على الجانب الأخر من الشاطىء من الأقصى للأقصى يعنى ده طبعا غير مترو الأنفاق إللى لولاه كان البلد ده إنفجرت من زمااااااااااااان
ولكوا أن تتخيلوا أيضا برضو بدون مبالغة دار السلام لا تحتولا على اى مصدر أمنى قرابة العشرين ساعة يوميا ولا حتى عساكر المرور ولا بعد تطبيق قانون المرور إللى بطبق فى كل مكان إلا دار السلام ودايما العربيات راكبة فوق بعضيها والطريق واقف طول اليوم والسواقين فى منتهى الخسة وقلة الأدب وبيدفعوا الركاب إللى هما عوازينه
والجميل بقى أنك لو خرجت من دار السلام الصبح
إبقى قابلنى لو عرفت تدخلها أخر النهار تسافر العراق أسهل
ويعينى بقى لو متريش وعايز تركب تاكسى لا سمح الله إبقى قابلنى لو وقفلك تاكسى هههههههههه
دى دار السلام يابا يعنى رجولة وأدب وأخلاق يعنى إللى يروح مايرجعش
يعنى التاكس لو لا قدر الله دخلها على الساعة 2 مش هيخرج منها قبل 5 ولو وقفت تاكسى مثلا وإنت فى التحرير وشايل حاجة تقيلة وده بيحصل فى المناسبات والأعياد الرسمية بس السواق يقولك تيييييييييييييت ويجرى
ياسيادة المحافظ ووزير الداخلية والمرور حضارتكم شغالين للبلد كلها مش للمهندسين ومدينة نصر وبس
دار السلام وعزبة خير الله وعزبة أبو قرن وفايدة كامل والبساتين والجزيرة ملزومين من سيادتكم برضو
يانواب مجلس الشعب ياريت نشوف حل إن شاالله حتى تنسفوها وتخلصونا طالما مش قادرين على مشاكلنا
دار السلام مليانة زبالة ومخدرات وشباب بيضيع على مرأى ومسمع من الحكومة الجميلة إللى بتتمثل فى معاون قسم البساتين
مجارى ضاربة وقلة مياه وتلوث ماشاء الله وتقصير فى كل نواحى الحياة وعدم تواجد أمنى بالمارة ولا حتى عسكرى مرور واحد
دار السلام بتخرب ياسادة
دار السلام بتموت
دار السلام بقيت دار شر
ملحوظة صغير

كل الأرقام التى وردت بهذا البوست أقرب للحقيقة وليست الحقيقة

وملحوظة كمان كان ممكن نملى البوست ده بالصور بس أنا بتكسف أنزل منتقتى بالكاميرا كده ليقولوا الواد إتجنن ولاحاجة ويقولوا دار السلام هتطلع فى التلفزيون ويموتونى

المنســــــــــــــــــــــــــى

هكذا ...........أحلم

هكذا أحلم أن أرى كل أصدقائى المدونين والمدونات مجتمعين دائما على فعل ا لخير وعلى الإيجاب وعلى العمل والعطاء لا السلب والإسترخاء
سعدت جدا بلقاء أصدقائى المدونين والمدونات من مختلف المحافاظات ومختلف الأوساط التدوينية ومختلف المهن
بجد بجد بشكرهم كلهم جدا على الوقت إللى قضيته معاهم لكى أستفيد من تجاربهم جميعا
وأتمنى أن يجتمعوا دائما على الحب والعمل والإيجابية والعطاء
أنا مش عايز أنسى حد ولكنى أذكر نفسى برؤياهم جميعا
ومش هتكلم كتير لأنى بجد مشغول وسبحان من خلانى أقعد عشان أكتب البوست ده وبجد مدونين سعدت بيهم كلهم أدب وأخلاق وذوق وعلم وثقافة وحب وحاجات كتييييييييييييييييييييييييييييييييييييييييير
أول واحد كان حبيب قلبى إللى شبه خاللى إللى حبيته أول ما شفته
أيهاب الشاب الشنكوتى
كريم يوميات مطلق
نوشا انا الغريب
هيثم الدهشان وهمسات عشق
خالد أبو همس و همس الأحباب
نوران الشاملى صاحبة الحفل وعروس اليوم ده البت خيخة
إللى عندها كمية حب وتفاهم مفيش بعد كده كانت لمانا زى ما نكون عيالها جايبة كم العطاء والحنية دى من عند أنهى عطار والله مش عارف
بجد شكر خاص جداااااااااا ليكى ياخيخة
وماما فاتيمة وصاحبتها إللى كانو منورين الحضور
وآبى برنسيس المدونين لاتعليق
وداليا وقوس قزح
ياسمين ويوميات فنانة مفروسة جدااااا
وشيماء وشيماء الجيزى
بابا أبو خالد وذكرياته
وحبيب قلبى بخفة دمه ويارب نبقى زمل إن شاء الله نيجروو
والجميل أستاذ أحمد إللى نفسى أقعد معاه تانى رحايا العمر
وعسقلانى إبن حجر العسقلانى
وماما شاهى أطيب قلب و مفيش حاجة
ودكتورة مروة ولماضة
أحمد سوووو عجوز وعنده تلاتين سنة
ورودى البنت المصرية
وميرة أمرأة بعقل رجل
ومدونة أحسن تستاهل
وضياء
أعذرونى أنا مقصر فى الكلام عنكم ولكن مهما أتكلمت مش هقر أوفيكم حقكم بجد
تحياتى ليكم كوووووووووولكم وإللى نسيتهم أو متعرفتش عليهم ميزعلوش منى
الجايات أكتر وبكرة أكيد أحسن أن شاء الله
ويارب يارب يارب يدوم علينا نعمة الحب والألفة واللمة والعمل والجد والتعاون اللهم أمييين
المنســــــــــــــــــــــــــــــــــــــــــــــــــــــــــــــــــــــى

أخيراااا........ا قالت حاجة عدلة

أه والله شوفتو إزاى أنا مش مصدق والله
قال إيه
أفتت دار الأفتاء المصرية أو دار إفتاء الحزب الوطنى الديمقراطى يلا مفرقتش كتير
المهم
أفتت وقالت وجلجلت وصحيت من النوم أخيرا وفاقت من الحاجة الأصفرا إللى كانت شرباها
وقالت إيـــــــــــــــه
قال إيه الإسلام لا يجيز التوريث سمعتى ياأم أحمد الإسلام لا يجيز التوريث ختى بالك ياأم جمال أهو شرعى أهو
الإسلااااااااااااااااام لاااااااااااااااا يجيــــــــــــــــــــــــز التوريــــــــــــــــــــــــــــث
أه أى نعم أنا لا أعترف بدار إفتاء الحزب ولا بشرعيةأى حاجة تابعة للحزب بس أهو حصل وعملوا حاجة عدلة فى حياتهم والواحد برضو لازم يقول إللى ليه وإللى عليه
إزاااااااااااااااااى بقى ده حصل
قال إيه بيقولوا إن طبقا للمادة 76 إللى أتفق عليها المصريين إللى هو إحنا يعنى إحنا إحنا
أه والله إحنا يعنى أنا وإنت ...............إنت يابنى إنت إنت بتبص فين أيوة والله إنت .....إيه مش مصرى ولا إيه منك لله يا إللى فى بالى نسيت الناس ملتها
المهم قالو إن نص المادة 76 إللى أتفقنا عليها بيقول إن رئيس الجمهورية
ركز معايا
ينتخب عن طريق الأقتراع السرى العام المباشر
كانت ناقصة النزيه الشفاف ههههههههههههههه
لذلك فإن النظام المتفق عليه بينا إحنا كمصريين ركزوا معايا إللى إتفقنا عليه هه إتفقنا
نون الجمع أهو
لاااااااااااااا يجيــــــــــــــــــــــز التوريــــــــــــــــــــث
ولا تولية العهد

اللهم بلغت اللهم فاأشهد
يعنى
يارب البعيد يفهم إننا رافضينه ومش طايقينه هو ولا أى حد من حزبه
وياريت ميعملش فيها عبده العبيط وميشرفناش بطلعته البهية
ياااااااااااااااااااااااارب
المنســــــــــــــــــــــــــــــــــــــــــــــــــــــــــــــــــــى

ممر التنية والتعمير

أو ممر الباز والذى ذكرناه فى البوست الماضى والموجود البانر بتاعه فوق على اليمين أهو وممكن تعمل سيرش على جوجل هتلاقى عنه حاجات كتير تخيل وإنت متعرفهوش
لالالالا مفيناش من الحاجات دى ياعم الحج إيه الكلام الكبير ده
لحظة واحدة سيدى الفاضل وهتفهم كل حاجة
مين هو ممر التنمية والتعمير ده : ده مشروع بيقترحه عالم مصرى إسمه فاروق الباز وذكرته أيضا فى البوست قبل الماضى ولو مش عارفه ياسيدى متزعلش نفسك ده عالم مصرى من علمائنا الأفزاز وهو عالم بيئة وجيولوجيا ويعمل بجامعة بوسطن الأمريكية من الثمانينات والآن بجانب عمله فى جامعة بوسطن يعمل أيضا فى ناسا
ماشى كلام جميل إيه هو بقى ممر التنمية والتعمير
د: فاروق الباز ده زى ماقولنا عالم مصرى مش عاجبه زى ماهو مش عاجبنى ولا عاجبك ولا عاجب أى مصرى عاقل إننا نعيش على مساحة ال5% من مساحة جمهورية مصر العربية فإقترح وهو عالم جليل وعلى علم تام وضراية تامة بكل شبر فى صحارى مصر ما هو الإقتراح ؟
إقترح ان نقوم بعمل ممر موازى لمصر الحالية موازى لوادى النيل بطول مصر الموجود بطول 1800 كم يبدأ من العلمين شمالا إلى بحيرة ناصر جنوبا وزلك بعمق داخل اصحراء الغربية حوالى 1200 كم ويصل بين هذا الممر الطولى الموازى لمصر إحدى عشر ممرا عرضيا بين مصر الحالية ومصر الموازية أو الممر الجديد إللى هو بطول مصر الموجودة حاليا وموازى ليها تماما وفى هذه الإحدى عشر ممرا سوف تدب كل وسائل الحياة وتنتشر كل مقومات المعيشة من جامعات ومستشفيات ومصانع ومؤسسات وأكشاك حاجة ساقعة ومحلات لبن وعصير وكل حاجة بلد جديدة ومصر جديد تولد أتمنى أن نولد معها من جديد
عرض هذا المقترح للمرة الأولى فى عهد الرئيس الراحل أنور السادات وكان على ما أعتقد على وزير إسكان أو رئيس وزراء مش فاكر بالظبط إسمه حسب الله الكفراوى
والرد على الموضوع كان بالرفض طبعا لإن العين بصيرة والإيد قصيرة
اما الأن وبعد إعادة دراسة المقترح وعلى حسب كلام د: فاروق الباز نحن أحوج ما يكون فى هذه الأونة لعمل مثل هذا المشروع والمشاريع التنموية الأخرى
ملحوظة المشروع ده مشروع بنية تحتية
مشروع بناء جيل
بناء مستقبل
بناء أمل
وليس كمشروع ميناء السخنة
ولا الشروق
ولا 6 أكتوبر
المشروع ده بناء حضارة
هو ده فعلا إللى هينقل مصر نقلة كبيرة أوى
ويضعها ليس فى مكانتها بين الأمم ولكن سيضعها على أول السلم فيقول دكتور فاروق نحن أحوج الناس إلى هذا المشروع الأن خاصة فى هذه المرحلة بالذات وفى ظل التعدى الملحوظ على الأراضى الزراعية على جانبى نهر النيل
يقال على حسب التقارير التى تكلمت عن الموضوع فى الصحف والندوات المختلفة إن مع بداية العمل فى هذا المشروع سيتوفر أكثر من نصف مليون فرصة عمل كبداية قاضيا على البطالة وغيرها من مقومات عجز الحياة فى بلدنا العزيز مصر
يعيد دكتور فاروق الباز طرح الموضوع على الجهات المختصة ولكنه وكالعادة وكما نعرف جميعا فإن فى أماكن إتخاذ القرار فى بلادنا العربية بأكملها تنشر مجموعة من العملاء الذين يعرقلون عمل العملاء ويمنعون أى إنجاز من الوجود على أرض واقعنا الأليم
فعليك أنت
أيوة إنت إنت
الذى تقرأ رسالتى هذه
فقط ان تتعرف على بلدك ومواردها أن تقرا كتاب فاروق الباز عن ممر التنمية والتعمير موجود بمكتبة العين ولو عملت سيرش على النت هتعرف عنوانها وتليفوناتها
عليك إنك تعرف المشروع ومميزاته وعيوبه وتشارك برأيك وبجهدك

نعمله عشان كدا وكدا ومنعملوش عشان كذا وكذا لو متكلمتش دلوقتى وشاركت دلوقتى هتتكلم إمتى وتشارك إمتى لازم تعرف مصلحة بلدك فين طالما إن إللى بيسموهم كبار مش عارفين أو مش عايزين يعرفواومتجاهلينك حاسسهم إنك عايش وموجود وليك رأى ووجهم رغم أنوفهم بدل ما عمالين يبرطعوا ومحدش قادر يلمهم
دى بلدنا كلنا مش عزبة حد
مش كده ولا إيـــــــــــــــــــــــــــــه
وعلى حسب الإحصائيات الخاصة بالمقترح إنه ميزانيته ستتكلف البلايين وليس المليارات ومحدش يقولى معندناش فلوس أحسنله
وعلى حسب كلام دكتور فاروق بيتقدم بإقتراح فى كتابه إن المشروع يكون مشروع قومى لإن مشروع وطن بالكامل ويتعمله إستفتاء ولو نجح وهيتنفذ المشروع إن شاء الله نبدأ برأس المال المحلى والحكومى ورجال الإعمال .............
وبعدها رأس المال العربى والمستثمرين العرب ثم المستثمرين الأجانب
هذا ولن أنسى ندوة كنت قد حضرتها عن هذا الموضوع لدكتور أحمد راشد كبير الداعين إلى هذا الموضوع عندما قال سر إزدهار أمريكا هو تخطيطها
الذى يسهل لك فى أن تكون محاضر فى جامعة فى ولاية ما وتسكن فى ولاية أخرى المسافة بين الولايتين كالمسافة من القاهرة إلى الإسكندرية او تزيد قليلا ولكن الوقت المقطوع فيها هو 30 دقيقة فقط بفضل شبكة الطرق الرهيبة الموجودة فى الولايات المتحدة
على عكس ما نشهده فى بلدنا العزيز فيوم منا بسافر إسكندرية بالقطار لو عمل معايا واجب يودينى فى 3 ساعات دو لو عمل ههههههههه
لنا الله
بجد ساعدونى إيدى فى إيدكم نبنى بلدنا ومستقبلنا إيدى فى إيدكم نفكر مرة مرة واحدة صح فى مستقبلنا قولوا أرائكم وأفكاركم وإزاى ننشر الموضوع إعلاميا وإزاى نبدأ نفكر فيه من البداية المشروع ده ينفع كلنا نفكر فيه الكاتب والسياسى والمهندس والمعمارى والمحاسب لإنه محتاجنا كلنا محتاج ولاد وبنات مصر إللى مش هتتصلح إلا بيهم وعلى إيديهم ياريت لو حد عنده أى حلول يكتبها ونناقشها
ده ممكن بجد يبقى حدث القرن كله
وآه لو مرة نأخذ برأى علمائنا ونستفيد من علمهم زى مالعالم كله بيستفيد من علم علمائنا إحنا وإحنا
حدث ولا حرج
مستنى أرائكم الإيجابية
ونجعل السلام دائما هو مsك الختام

تحديث

http://www.facebook.com/group.php?gid=25883624458

ده الممر على الفيس بوك لمن يريد التواصل والإدلاء بالمقترحات والعمل على نشر هذا المقترح

تحديث 2

هحطلكوا شوية صور من كتاب الباز مأخوذة من أقمار صت=ناعية يتم دفعها إلى 36000كيلو متر فوق سطح الأرض وعند هذا الأرتفاع تعادل سرعة دورانها حول الأرض سرعة دوران الأرض حول محورها لذلك تبقى ثابتة فوق نفس النقطة من خط الإستواء ومحدش يسألنى فى أى حاجة عشان مش فاهم أى حاجة من إللى أنا بقولوه ده

وصور أيضا اخذت عن طريق

برنامج لاندسات الأمريكى منذ إنطلاق أولها عام 1972

وأقمار لاند سات تبث صورا توضح أجساما بنصف حجم 15 مترا ما أوضحه أحسن ما سلفه 30 مترا ولذلك فمعلومات وصور هذه الأقمار تستخدم بكثرة فى دراسة الأرض من الفضاء

خريطة توضح دلتا النيل باللون الأحمر وإزدياد الزراعة على جانبيها باللون الأزرق من 1972 - 1990
خريطة طبوغرافية توضح مسارارات الممر وهى عبارة عن خطوط رفيعة باللون الأحمر خارجة من مصر الحالية

خريطة مبسطة لموقع محور الإسكندرية والصورة التى بالأسفل صورة فضائية للمسار
المنســــــــــــــــــــــــــــــــــــــــــى

الأقصر لاس فيجاس

ده كان بوست قديم عندى كنت نزلته قبل كده على مدونتى القديمة قبل ما أمسحها

وحسيت إنى عاوز أتكلم فى الموضوع ده تانى

المواضيع مخلصتش ولا حاجة ولكن المشكلة لاتزال قائمة وهو ما شجعنى على الكلام فى نفس الموضوع

والبحث عن حل

مع الموضوع

السلام عليكم ورحمة الله وبركاته
الأقصر لاس فيجاس وحقوق الملكية الفكرية
إتكلمنا قبل كده على بلوج الكلية على الأقصر لاس فيجاس
ولسة كتيييييييييييير مننا لغاية دلوقتى ميعرفش يعنى إيه الأقصر لاس فيجاس
تعالو معانا نعرف يعنى إيه الأقصر لاس فيجاس
بس أعذرونى إن أطلت عليكم لإنه والله غصب عنى لإن الموضوع ده كل يوم بيعصبنى عن اليوم إللى قبله
ونظرا لإنى زهقت من كتر الكلام ده مع كل القريبين منى تقريبا بقى مفيش حد يعرفنى إلا ويعرف الأقصر لا فيجاس
أو على الأقل سمع عنها
إيه الحكاية ياعم إنجز وجعت دماغنا
هقولكم إيه الحكاية
كل مافى الموضوع إن حضارتنا وتاريخنا ولغتنا ولغتنا كمان أه ولغتنا كمان زى ماكلمتكوا فى موضوع الفرانكو أرب ( ده كان على البلوج أو المدونة القديمة برضو )
وجدودنا تسلب منا وإحنا واقفين ساكتين بل ورافضين رفض تام مبدأ إننا نعمل حاجة أو حتى نتكلم أو يبقى لينا علاقة
بالموضوع أصلا

ياراجل طب هو إيه إللى حصل
إللى حصل إن لاس فيجاس دى من ولاية من الولايات المتحدة الأمريكية أو كما يطلقون عليها مدينة الأحلام
قدمت هذه المدينة بإغتصاب حقوقنا فى الحفاظ على تراثنا وحضارتنا فقدمت على مايسمونه إستنساخ للأثار المصرية معرفش إمتى
فجأة كده لقينا عندهم الهرم الكبير وأبو الهول بنفس سكيلهم أو مقاسهم يعنى ونركز شوية مع كلمة بنفس سكيلهم دى أه فعلا بالظبط كده وهوده إللى حصل
ومش بس الهرم وأبو الهول لأ ده أخد كمان مدينة الأقصر المصرية كاااااااااملة وأطلقو عليها مدينة الأقصر لاس فيجاس
وكمان المشكلة الأكبر من كده بكتيييييييير إيماننا منهم بإن اليهود هما إللى بنوا الهرم واليهود والأمريكان واحد وضعوا على الهرم الكبير نجمة داوود
طب إيه رأيكم ديه كمان مش مشكله يا عم زهأتنا وديه كمان مش مشكله أماال إيه المشكله

المشكله إننا لاتحركنا ولا اتكلمنا ولكن فى مننا كتير النهارده بيقولوا إن فعلاً اليهود إلى بنوا الهرم مع إن مثبت فى كتب كتير جداً وعلى رأسهم كتاب شخصية الهرم للمعمارى أحمد إبراهيم حلمى وموسوعة مصر القديمه للدكتور سليم حسن إن اليهود أصلاً ظهروا فى الأسره ال19 والهرم أجددنا بنوه فى الأسره التانيه والتالته زى ما قلت ده كله مش مشكله المشكله إن يطلع ناس مننا إحنا يقولوا إن اليهود بنوا الهرم ولو حتى كأداه كما يزعم البعض إن الفراعنة أغارو عليهم وأخذوهم لبناء الهرم غصب وإقتدار لأ والأدهى والأمر إن عند إفتتاح مدينة الأقصر لاس فيجاس الأمريكيه أهدت الحكومه المصريه إلى الحكومه الأامريكيه بما إنهم حكومتين صديقتين تحالفوا ضد مصالح هذا الشعب متحفاً كاملاً يضم عناصر غنيه من الأثار المصريه كإهداء للإنجاز العظيم التى أنجزته الكلام إلى أنا قلته ده كله حصل خلاص النهادرده بأه إيه إلى بيحصل
1 . عدد زوار الأقصر لاس فيجاس 46 مليون سائح سنوياً فى حين
2 . عدد زوار الأقصر المصريه 4 مليون سائح سنوياً
3 . يخدم الأقصر لاس فيجاس مليون ومئتى موقع على شبكة الإنترنت
4 . فى حين يخدم الأقصر المصريه ألف ومتين موقع على شبكة الإنترنت
متخيلين نهبنا إلى أى مدى يا عم بطل حسد طب همه ناس بتشتغل وعرفت تظبط نفسها بطل أر وخليك فى حالك أنا مش بأر ولا حاجه بس فى قانون دولى إسمه حقوق الملكيه الفكريه وده المفروض بيحمى حقى وحقك وحقنا كلنا طب على الأقل نحاول نستخدمه
طب وهوه فيه حد قبل كده إستخدمه

طبعاً
زى مييييييييييييين هقولك يا سيدى
1 . عارفين صاحب شركة دجاج كنتاكى طبعاً عارفينه
كنتاكى ديه ولايه من الولايات المتحده الامريكيه إتسمت واشنهرت بإنتاج الدجاج... لما اتسعت شهرة دجاج كنتاكى كسلسلة مطاعم لعمل الدجاج بطعم مميز رفعت عليهم ولاية كنتاكى قضيه فى اليونسكو وهى قضية حقوق الملكيه الفكريه ليـــــــــــــــه لمجرد إنهم مستخدمين إسمهم إسم ولاية كنتاكى طب وبعدين عملوا إيه كسبوا الأمريكان القضيه كالعاده وعرضوا على دجاج كنتاكى عرض من إتنين يا إما تدفع نسبه من ألأرباح على استخدامك لإسم الولايه ويا إما مافيش دجاجه تدخل سلسلة مطاعم كنتاكى إلا من إنتاج ولاية كنتاكى وفاز بالقبول العرض الثانى وهمه طبعاً المستفيدين
طب ماشى يا عم ديه أمريكا إلى استخدمته

لأ ثوانى فى حد تانى زى ميـــــــــــــن هقولك برضو شوف أنا حلو معاك إزااااى
طبعاً كلنا نعرف برج إيفيل وموجود فى فرنسا ما علينا ماله يا عم البرج الإمارات وتحديداً فى إمارة دبى عملوا واحد زيه وبنفس إسكيله وعلمت فرنسا بالموضوع تعمل إيــــــــــــــــــــه
رفعت هيه كمان قضية حقوق ملكيه فكريه وكسبتها فى وقت قليل جداً والآن فرنسا تتقاضى مبلغ 150 مليون يورو سنوياً من الإمارات ده على شان البرج بس شوفت إزاااااااااااااااى طب يا عم ديه فرنسا طب إسمع ديه كمان

طريفه من الطرائف

للمصريين فقط
فرنسا بدأت تستنسخ الأثار المصريه ولكن الصين سبقتها إلى هذا العمل وعند معرفة الصين بأن فرنسا تستنسخ أثاراً مصريه رفعت الصين قضية حقوق ملكيه فكريه على فرنسا لأنها تشاركها فى إستنساخ الأثار المصريه محدش يضحك واحنا المصريين إلللى أصلاً أصحاب المولد كله لا حياة لمن تنادى
لينا حق نتكلم ولا لأ مش بأوول هانعمل حاجه ولكن نتكلم الأول وبعدين نتفأ ده أكيد هايوصلنا فى الأخر لحاجه بس يبأه فيه موضوع ويبأه فى هدف فى الأخرصدقونى أكيد هايبأه فيه فعل

وكما قال الأبنودى
في حد ممكن أن يفرط فى لحية وأكفان وجلباب بل وعصا جده نعم
ها نحن المصريون الأصلاء
ملحوظه
كل الكلام المذكور من ندوة الأستاذ الدكتور أحمد يحيى راشد
رئيس قسم العماره بكلية الهندسه جامعة المنصوره والمتولى الموضوع ولايه كامله
ولو عملت بحث ببعض الكلمات على موقع جوجل مثلاً بإسم لأقصر لاس فيجاس أول ما سوف يظهر لك هذا اللبحث الشهير الذى أعده الدكتور راشد وسلمه إلى رئاسة مجلس الوزراء المصرى ولم يصله رد وأيضاً قام بأبحاث أخرى وسلمه لدكتور زاهى حواس رئيس المجلس الأعلى للأثار وأيضاً لم يجد الرد وغيرها إلى دكتور فاروق حسنى وزير الثقافه وأيضاً لم يجد الرد وقم بحملته الشهيره على مواقع الأنترنت وكلما ذهب إلى مكانت أو ندوه أو محاضره يردد نفس الكلام ويتكلم فى نفس الموضوع آملاً أن ينشره ومن ضمن هذه المرات كانت سبب معرفتى بالموضوع عندما جائنا الدكتور راشد فى كلية الفنون الجميله قسم العماره وذلك يوم الأربعاء الموافق 9 مايو 2006
يا رب الكلام ده يكون مصحوب بقليل من الفعل والله ماهنقدر نبنى مستقبلنا إلا لما نؤمن بماضينا وكلنا عارفين المثل الشهير من فات قديمه تاه يا رب نتحرك يا رب مانسكتش يا رب نعمل حاجه متهيألى مافيش وقت محتاجين فيه إننا نتكلم أكتر من الوقت ده
ولو إحنا فعلاً دفعة عماره دفعه بجد لازم نعلق على الموضوع ده تعليقات بناءه

دفعتى إللى كنت منلهم الموضوع قبل كده برضو
لنرى ماذا سنفعل حيال من يحاولون أن يمسحون أسماء المصريين بل والعرب بل والمسلمين من على وجه الدنيا نهائياً
هذا والله الموفق
والسلام ختام
ملحوظة كمان الصورتين دول والصورة إللى فوق من جوجل للأقصر لاس فيجاس
المنســــــــــــــــــــــــــــــــــــــــــــــــــــــــــى